“Ijtimoiy himoya yagona reyestri” axborot tizimi doirasida Yagona interaktiv davlat xizmatlari portalida “Kam ta’minlangan deb e’tirof etilgan oila to‘g‘risida ma’lumotnoma” davlat xizmati ishga tushirildi (https://my.gov.uz/uz/service/479). 
O‘zbekiston Respublikasi Moliya vazirligi tomonidan 2022 yil 14 fevral kuni Texnik talabnoma tasdiqlanib, Axborot texnologiyalari va kommunikatsiyalarini rivojlantirish vazirligiga taqdim qilindi. 
“Ijtimoiy himoya yagona reyestri” axborot tizimida oila tarkibini avtomatik tarzda shakllantirish funksiyasi yo‘lga qo‘yildi.
Mahalladan turib barcha davlat organlariga murojaat qilish hamda ularning rahbarlari bilan muloqot qilish tizimini yaratish yuzasidan mahalla faoliyatida qog‘ozbozlikni kamaytirish maqsadida taqdim etilishi lozim bo‘lgan hisobotlar xatlovdan o‘tkazilib, keskin kamaytirish hamda ularning tugal ro‘yxatini tasdiqlash, ularni to‘ldirish va taqdim etish jarayonini to‘liq raqamlashtirish joriy etildi.

Mahallalarning jamoatchilik bilan aloqalarini kuchaytirish, ommaviy axborot vositalari va ijtimoiy tarmoqlarda tanqidiy materiallar orqali bildirilayotgan muammolarni hal etish samaradorligini oshirish bo‘yicha Kompleks chora-tadbirlar rejasi Mahalla va nuroniylarni qo‘llab-quvvatlash vaziri tomonidan 2022 yil 6 iyunda tasdiqlandi.
Chora-tadbirlarda mahalla sohasiga oid masalalar, jumladan ommaviy axborot vositalari va ijtimoiy tarmoqlarda e’lon qilinayotgan tanqidiy materiallarni aniqlash va o‘z vaqtida munosabat bildirishni tizimli tashkil qilish, mahallaning ijobiy imijini shakllantirish, uni xalqchil jamoat idorasiga aylantirishda ijtimoiy so‘rovlar o‘tkazish va jamoatchilik fikrini o‘rganish, tizimdagi o‘zgarishlarni keng jamoatchilik va aholini tezkor xabardor qilib borish kabi qator masalalar belgilandi.
Kompleks chora-tadbirlar rejasiga muvofiq:
O‘zbekiston Respublikasi Prezidentining “Ommaviy axborot vositalari mustaqilligini ta’minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida” 2019 yil 27 iyundagi PQ-4366-son Qaroriga muvofiq, Mahalla va nuroniylarni qo‘llab-quvvatlash vazirligi hamda uning hududiy bo‘linmalarida Axborot xizmati faoliyatini tashkil etish choralarini yanada jadallashtirish maqsadida Vazirlar Mahkamasining 2022 yil 
15 apreldagi 73-son farmoyishiga asosan Mahalla va nuroniylarni qo‘llab-quvvatlash vazirligi binosi hududidagi bo‘sh yer uchastkasida Media-markaz qurilib, 2022 yil 2 sentyabr kuni foydalanishga topshirildi.
Mahalla va nuroniylarni qo‘llab-quvvatlash vazirligi Axborot xizmati faoliyati samaradorligini oshirish maqsadida Media markaz faoliyatini tashkil etish maqsadida Media markazning tashkiliy, huquqiy asoslari va kadrlar masalasini belgilovchi normativ-huquqiy hujjat va Nizom loyihasini ishlab chiqildi.
Mahalla va nuroniylarni qo‘llab-quvvatlash vazirligi veb-sayti, telegram, feysbuk, instagram kabi ijtimoiy tarmoqlardagi sahifalarini aholiga tezkor va ishonchli axborot yetkazuvchi resurslar sifatida ta’sirchanligini oshirish maqsadida Mahalla va nuroniylarni qo‘llab-quvvatlash vazirligining veb-saytining texnik jihatlari, dizaynini zamonaviy talablarga muvofiqlashtirish, ijtimoiy tarmoqlardagi sahifalarga joylashtiriladigan kontentlar ta’sirchanligini, a’zolar sonini oshirish choralari ko‘rilmoqda.
Mahalla va nuroniylarni qo‘llab-quvvatlash vazirligining ijtimoiy tarmoqlardagi rasmiy sahifalarini yuritish Reglamenti ishlab chiqildi.
Ijtimoiy tarmoqlar orqali ommaviy axborot vositalari va jamoatchilik bilan ishlash strategiyasini ishlab chiqish, jurnalistlar va blogerlar, boshqa soha mutaxassislari bilan doimiy ishlash maqsadida sohaga doir yo‘nalishlarda ijtimoiy tarmoqlarda faol bo‘lgan jurnalist va bloger, jamoatchilik vakillaridan iborat tarkibda “Jamoatchilik guruhi”ni tashkil etish bo‘yicha guruhning namunaviy ro‘yxati va Nizomi loyihasi ishlab chiqildi.
Mazkur faoliyat bo‘yicha amalga oshirilayotgan ishlar yuzasidan OAV vakillari uchun matbuot anjumanlari, brifing va boshqa tadbirlar orqali hisobot berib borilmoqda.
Bundan tashqari, Vazirlar Mahkamasining 
2022 yil 15 apreldagi 173-F-son Farmoyishiga muvofiq vazirlikda soha targ‘ibotini olib borish hamda tanqidiy materiallarga doimiy munosabat berib borish maqsadida Media-markaz qurilib foydalanishga topshirildi.
Tizimdagi islohotlarning mazmun-mohiyati, qabul qilinayotgan normativ-huquqiy hujjatlar, amaliy natijalarni aholiga tezkor, ta’sirchan va muntazam yetkazib borilmoqda.
Ommaviy axborot vositalari va ijtimoiy tarmoqlarda e’lon qilinayotgan tanqidiy materiallarni aniqlash va unga o‘z vaqtida munosabat bildirilib borilmoqda.
Turli mavzularda ijtimoiy so‘rovlar o‘tkazish va boshqa shakllarda jamoatchilik fikrini o‘rganish ishlari olib borilmoqda.
Amalga oshirilayotgan ishlar yuzasidan OAV vakillari uchun 5 ta matbuot anjumani o‘tkazildi.
“Mahalla institutini yanada takomillashtirish, “mahallabay” tamoyili bo‘yicha amalga oshirilayotgan ishlar: natijalar, istiqboldagi vazifalar” mavzuida 2 ta brifing o‘tkazildi.
Mahalla va nuroniylarni qo‘llab-quvvatlash vazirligi rasmiy saytlari va ijtimoiy tarmoqlar sahifalarida 164 ta material e’lon qilindi.
Media-markaz vazirlikda ommaviy axborot vositalari, ijtimoiy tarmoqlar va messendjerlarda mahalla yuzasidan bildirilayotgan tanqidiy axborotlar bilan ishlash, ko‘tarilayotgan muammolarni hal etishning samaradorligini oshirish bo‘yicha kompleks choralar ko‘rish, mutasaddi vazirlik va idoralar bilan o‘zaro axborot almashish borasida samarali faoliyat olib bormoqda.

Hokim yordamchilari tomonidan o‘tkazilgan xatlov natijalariga ko‘ra 2,5 mingta mahalla chorvachilik, 1,4 mingta mahalla dehqonchilik, 800 ta mahalla bog‘dorchilik, 620 ta mahalla issiqxona, 230 ta mahalla hunarmandchilik, 
470 ta mahalla kichik ishlab chiqarish, 
2,2 mingta mahalla savdo va xizmat ko‘rsatishga ixtisoslashganligi aniqlandi.
Mazkur ixtisoslashuvidan kelib chiqqan holda Qoraqalpog‘iston Respublikasi Vazirlar kengashi, viloyatlar va Toshkent shahar hokimliklar tomonidan mahallalarda sanoat, hunarmandchilik, kasanachilik va chorvachilik faoliyatini amalga oshirayotgan fuqarolarni har tomonlama qo‘llab-quvvatlash, ularning faoliyat yuritish sharoitlarini yaxshilash maqsadida “yo‘l xaritalari” tasdiqlandi.
O‘zbekiston Respublikasi Prezidentining “Mahallalarda sanoat, hunarmandchilik, kasanachilik va chorvachilik mikromarkazlarini tashkil etish chora-tadbirlari to‘g‘risida” 
2022 yil 25 iyuldagi PQ–331-son qarori qabul qilindi.
Qaror bilan mahallalarda sanoat, hunarmandchilik, kasanachilik va chorvachilik yo‘nalishlarida tashkil etiladigan mikromarkazlarning manzilli ro‘yxati hamda ularni istiqbolda tashkil etish reja-grafigi tasdiqlandi.
Hisobot davrida hokim yordamchilari tomonidan shakllantirilgan 41 mingdan ortiq “mahallabay” mikroloyihalardan 40 mingtasi ishga tushirilib, 170 mingta yangi ish o‘rinlari yaratildi.
Mahallalarda amalga oshirilgan ishlar natijasida 61 mingta yuridik va 62 mingta yakka tartibdagi tadbirkorlik subyektlari davlat ro‘yxatidan o‘tkazildi.

O‘zbekiston Respublikasi Prezidentining “Ijro etuvchi hokimiyat organlarining faoliyatini yanada takomillashtirish va bosqichma-bosqich nomarkazlashtirish yuzasidan qo‘shimcha chora-tadbirlar to‘g‘risida” qarori loyihasi ishlab chiqildi.
Loyiha 2022 yil 30 iyunda Adliya vazirligi tomonidan Vazirlar Mahkamasiga kiritildi.
Loyiha Vazirlar Mahkamasi tomonidan 2022 yil 13 iyulda Oliy Majlis Senatiga kelishish uchun kiritildi.
Loyiha O‘zbekiston Respublikasi Bosh vaziri huzurida himoya qilinib (viza olinib), 2022 yil 14 oktyabrda O‘zbekiston Respublikasi Prezidenti Administratsiyasiga kiritildi.
Yangi O‘zbekiston sharoitida zamonaviy talablarga javob beradigan ixcham davlat boshqaruvi tizimini shakllantirish, qaror qabul qilish va masalani ko‘rib chiqish jarayonlarini soddalashtirish orqali davlat organlari rahbarlarining mas’uliyatini oshirish hamda ular faoliyatini natijadorlikka yo‘naltirish, shuningdek, Yangi O‘zbekiston ma’muriy islohotlari dasturi ijrosini ta’minlash maqsadida O‘zbekiston Respublikasi Prezidentining “Yangi O‘zbekiston ma’muriy islohotlari doirasida respublika ijro etuvchi hokimiyat organlari faoliyatini samarali tashkil etish chora-tadbirlari to‘g‘risida” 2022 yil 21 dekabrdagi PQ–447-son qarori qabul qilindi. Qaror bilan:
Yangi O‘zbekiston ma’muriy islohotlari doirasida barcha respublika ijro etuvchi hokimiyat organlarining qariyb 5 ming funksiyalari xatlovdan o‘tkazilib, 500 ga yaqin takrorlanadigan, o‘z ahamiyatini yo‘qotgan hamda amalga oshirish mexanizmlari bilan ta’minlanmagan funksiyalar aniqlanganligini inobatga olgan holda respublika va hududiy ijro etuvchi hokimiyat organlari funksiyalarining ochiq reyestrini shakllantirish va uni doimiy yuritish amaliyoti yo‘lga qo‘yilishi, bunda:
Funksiyalar yagona reyestriga kiritilgan har bir funksiya bo‘yicha ularni respublika, viloyat va tuman (shahar) kesimida amalga oshirish uchun tashkiliy-huquqiy mexanizmlar, moliyaviy-iqtisodiy va kadrlar resurslari bilan ta’minlanganlik holati aks ettirilishi;
amalga oshirish mexanizmi bo‘lmagan funksiyalarni zarur tashkiliy-huquqiy mexanizmlar, moliyaviy-iqtisodiy va kadrlar resurslari bilan ta’minlash, o‘z ahamiyatini yo‘qotgan funksiyalarni esa bekor qilish bo‘yicha takliflar kiritilishi;
qonunchilik hujjatlari bilan ijro organlariga yuklatiladigan funksiyalar bir vaqtning o‘zida majburiy tarzda Funksiyalar yagona reyestriga kiritilib, takrorlanuvchi funksiyalar bekor qilinishi;
funksiyalarni raqamlashtirish va inson omilini qisqartirgan holda avtomatlashtirish yuzasidan takliflar kiritilishi;
Iqtisodiyot va moliya vazirligi tomonidan har yili respublika budjetidan respublika davlat boshqaruvi organlariga ajratiladigan mablag‘larning cheklangan miqdorlarini belgilashda Funksiyalar yagona reyestrida nazarda tutilgan funksiyalar mezon sifatida inobatga olinishi;
Adliya vazirligi tomonidan Funksiyalar yagona reyestrini elektron tarzda yuritish imkonini beradigan “Davlat funksiyalari” avtomatlashtirilgan onlayn axborot tizimi yuritilishi;
Adliya vazirligi manfaatdor idoralar bilan birgalikda 2023 yil 1 martga qadar Funksiyalar yagona reyestri va uni yuritish tartibi bo‘yicha qaror loyihasini Vazirlar Mahkamasiga kiritilishi belgilandi.
Hozirda mazkur qaror ijrosi bo‘yicha kompleks chora-tadbirlar amalga oshirilmoqda.

ISO 9001 xalqaro standartini bosqichma-bosqich joriy qilish bo‘yicha chora-tadbirlar rejasi loyihasi ishlab chiqilib, vazirlik va idoralarga ushbu loyiha asosida o‘z chora-tadbirlar rejasini ishlab chiqish uchun yuborildi (16.02.2022 y., 
05/368-son xat).
Natijada, 31 ta vazirlik va idoralar tomonidan chora-tadbirlar rejasi ishlab chiqilib, tasdiqlandi.
Chora-tadbir rejasiga muvofiq, 2022 yilda – 19 ta, 2023 yilda – 9 ta, 2024 yilda – 3 ta vazirlik va idoralar tomonidan ISO 9001 xalqaro standart talablariga muvofiq sifat menejmenti tizimini joriy etish rejalashtirilgan.
2022 yil 31 mart hamda 4 aprel kunlari xalqaro ekspertlarni jalb qilgan holda vazirlik va idoralar uchun “ ISO 9001 xalqaro standartini joriy etishni afzalliklari va joriy etish bosqichlari” bo‘yicha onlayn seminar-treninglar o‘tkazildi.
Vazirlik va idoralar faoliyatiga sifat menejmenti tizimining xalqaro standartini ( ISO 9001) joriy qilish maqsadida 61 ta vazirlik va idoralar ro‘yxati (ro‘yxati ilova qilinmoqda) shakllantirildi.
2022 yilda 19 ta vazirlik va idoralarda sifat menejmenti tizimining ISO 9001 xalqaro standarti joriy qilindi.
Vazirlik – 3 ta, davlat qo‘mitasi – 3 ta, davlat inspeksiyalari – 1 ta, agentlik – 7 ta, qo‘mita – 1 ta, markazlar – 4 ta.
2 ta vazirlik va idoralar faoliyatiga 37001 xalqaro standartlar talablariga muvofiq menejmenti tizimlari joriy etilgan.
Ma’lumot uchun: 37001 xalqaro standarti ISO ning menejment tizimlari uchun standartlarga nisbatan talablarga mos keladi. Ushbu talablar foydalanuvchilarga menejment tizimlari uchun standartlar joriy etilishini osonlashtiruvchi yuqori darajadagi tuzilma, aynan o‘xshash asosiy matn va umumiy atamalar, shuningdek asosiy atamalar va ta’riflarni o‘z ichiga oladi. Ushbu hujjat boshqa menejment tizimlari uchun standartlar (masalan, ISO 9001, ISO 14001, ISO/IEC 27001 va ISO 19600) hamda boshqaruvga oid standartlar (masalan, ISO 26000 va ISO 31000) bilan birgalikda qo‘llash mumkin.
Natijada, bugungi kunda 21 ta (34 foiz) vazirlik va idoralarning ish yuritish hamda ma’muriy boshqaruv jarayonlariga sifat menejment tizimlari joriy qilindi.
Agentlik tomonidan 2022 yil 23 dekabrdagi 05/4825-son xat bilan Vazirlar Mahkamasiga amalga oshirilgan ishlar to‘g‘risidagi ma’lumot kiritilgan.

O‘zbekiston Respublikasi Oliy Majlis Senatining 2022 yil 3 fevraldagi SQ–464-IV-son qarori bilan “O‘zbekiston Respublikasi Oliy Majlis Senatining 2022-2026 yillarga mo‘ljallangan Yangi O‘zbekistonning taraqqiyot strategiyasini “Inson qadrini ulug‘lash va faol mahalla yili”da amalga oshirishga oid davlat dasturi ijrosini ta’minlash bo‘yicha chora-tadbirlar rejasi” tasdiqlandi.
Davlat budjetini qabul qilish va uning ijrosi borishini nazorat qilish doirasida parlament tomonidan mas’ul tashkilotlarga aniq strategik vazifalarni qo‘yish va ulardan natijaga qarab so‘rov qilish amaliyotini joriy qilish maqsadida ushbu qarorga asosan Qonunchilik palatasi Reglamentining 45-moddasi quyidagi mazmundagi 101-band bilan to‘ldirildi: 
“101) tegishliligi bo‘yicha vazirliklar va idoralar kesimida davlat budjeti mablag‘larining samaradorligi bilan bog‘liq bo‘lgan maqsadli indikatorlarning bajarilishi yuzasidan hisobotlarni har chorak yakunlari bo‘yicha ko‘rib chiqadi”;
244-moddaning uchinchi qismi quyidagi mazmundagi beshinchi xatboshi bilan to‘ldirildi:
“o‘zi saylangan hudud bo‘yicha kelgusi yil uchun mo‘ljallangan ijtimoiy va ishlab chiqarish infratuzilmasini rivojlantirish dasturlariga kiritiladigan investitsiya loyihalarining shakllantirilishi yuzasidan tegishli xalq deputatlari mahalliy kengashlarining majlislaridagi muhokamalarda o‘z takliflari va tavsiyalari bilan ishtirok etadi”.

O‘zbekiston Respublikasi Oliy Majlisi Qonunchilik palatasi va Kengashining va O‘zbekiston Respublikasi Oliy Majlisi Senati Kengashining 2022 yil 20 maydagi 2123-IV/KQ-348-IV-son qarori bilan O‘zbekiston Respublikasi Oliy Majlisi palatalarining mahalliy Kengashlar bilan hamkorligini kuchaytirish bo‘yicha “yo‘l xaritasi” tasdiqlandi.
 “Yo‘l xaritasi”ga asosan:
Qonunchilik palatasi deputati yordamchisining mahalliy Kengashlar Kotibiyatlari bilan ma’lumot almashinuvi;
“Qonunchilik palatasi deputati - uning yordamchisi - mahalliy Kengash deputati” tizimi asosida hududlarda nazorat-tahlil tadbirlari o‘tkazishda va saylovchilar bilan uchrashuvlar tashkil etishda hamkorlik qilish;
“Qonunchilik palatasi deputati - uning yordamchisi - mahalliy Kengash deputati” tizimi asosida qonun loyihalari bo‘yicha mahalliy Kengash deputatlarining fikr va takliflarni olish amaliyoti yo‘lga qo‘yildi.
3. “Yo‘l xaritasi”ga asosan:
Qonunchilik palatasidagi siyosiy partiyalar fraksiyalari, Senatning qo‘mitalari hamda komissiyalari majlislarida, parlament nazorati tadbirlarida mahalliy Kengashlardagi partiya guruhlari, doimiy komissiyalar vakillarining ishtirok etishini, ularning fikrlarini olish amaliyotini kuchaytirish;
Qonunchilik palatasida ko‘rib chiqilayotgan qonun loyihalari yuzasidan mahalliy Kengashlar deputatlarining takliflarini olish amaliyotini yo‘lga ko‘yish;
Mahalliy Kengashlarda muhim masalalarni eshitishga oid tadbirlarda hududdan saylangan Qonunchilik palatasi deputatlari va Senat a’zolarining ishtirok etishlarini ta’minlash;
Mahalliy Kengashlar tomonidan zarur hollarda joylardagi tizimli muammolar yuzasidan Oliy Majlis palatalariga masala kiritish amaliyotini kuchaytirish nazarda tutildi.
Oliy Majlis Senati tomonidan xalq deputatlari mahalliy Kengashlari deputatlari uchun ularning qonunchilikdagi yangiliklar va o‘zgarishlar yuzasidan bilim va ko‘nikmalarini oshirib borish maqsadida 2022 yil I yarim yilligi uchun seminarlar tashkil etish rejasi tasdiqlandi. Hisobot davrida mahalliy Kengashlarning doimiy komissiyalari raislari, kotibiyat mudirlari uchun 
4 marotaba seminarlar tashkil etildi. 
Jumladan: 
2022 yil 26 yanvar kuni Budjet va iqtisodiy islohotlar masalalari qo‘mitasi tomonidan mahalliy budjetni shakllantirish, xalq deputatlari mahalliy Kengashlarining budjet jarayonidagi roli va budjet ijrosi ustidan deputatlik nazoratini tashkil qilishda mahalliy Kengashlar oldidagi vazifalar bo‘yicha;
2022 yil 14 fevral kuni Senat Raisi rahbarligida 2022-2026 yillarga mo‘ljallangan Yangi O‘zbekistonning taraqqiyot strategiyasi mazmun-mohiyatini, mahalliy Kengashlar faoliyatiga doir chora-tadbirlar, shuningdek, 2021 yil yakunlari bo‘yicha xulosalar va 2022 yildagi vazifalar, yangi ish o‘rinlarini yaratish va aholi bandligini ta’minlash, yo‘l harakati xavfsizligini ta’minlash borasida mahalliy Kengashlar tomonidan amalga oshiriladigan nazorat tadbirlari to‘g‘risida;
2022 yil 28 fevral kuni Yoshlar, madaniyat va sport masalalari qo‘mitasi tomonidan mahallalarda yoshlar bilan ishlash tizimini tubdan takomillashtirishda xalq deputatlari mahalliy Kengashlari doimiy komissiyalarining o‘rni haqida. 
Adliya va Moliya vazirliklari bilan birgalikda 2022 yil 19 aprel kuni o‘tkazilgan seminarda ikkita muhim masala – mahalliy vakillik va ijro hokimiyati organlari norma ijodkorligi faoliyatida qonuniylikni ta’minlash hamda “Tashabbusli budjet” doirasida jamoatchilik fikri asosida shakllantirilgan tadbirlar ijrosini ta’minlash masalalari bo‘yicha vazifalar belgilab olindi.

Axborot texnologiyalari vazirligi tizimidagi “Yagona integrator “UZINFOCOM” MCHJ tomonidan Deputatlarning o‘z saylovchilari bilan bog‘lash va aholi bilan ochiq muloqotni amalga oshirish, ularga murojaatlar yuborish va murojaatlar natijasida deputatlarni baholash imkoniyatini beruvchi “O‘zbekiston Respublikasi Deputatlari portalini yaratish” loyihasi ishlab chiqildi. 
Mazkur loyihaga Axborot texnologiyalari vazirligining 2020 yil 20 maydagi EZ-09-8/2659-son ijobiy ekspert xulosasi olindi va 2020 yil 30 iyunda O‘zbekiston Respublikasi Prezidenti Administratsiyasi bilan kelishildi hamda 2020 yil 9 iyulda Oliy Majlis Qonunchilik palatasi tomonidan tasdiqlandi. 
Loyihaga binoan “O‘zbekiston Respublikasi Deputatlari portali” va uning mobil ilovasi ishlab chiqildi hamda deputat.gov.uz havolasida test rejimida ishga tushirildi.
Loyiha doirasida deputatlari bazasi yaratildi, Deputatlar portalida deputatlarni aniq saylov okrugiga bog‘lash va fuqarolarning doimiy istiqomat qilish joyi asosida saylangan deputatlarni aniqlash maqsadida Davlat kadastri agentligi, Elektron hukumatning yagona identifikatsiya tizimi (id.gov.uz), Deputat so‘rovlarini davlat tashkilotlariga yuborish uchun “ijro.gov.uz” ijro intizomi tizimi, Qonunchilik palatasining “Elektron hujjat aylanish tizimi” va “Qonun ijodkorligi faoliyatining avtomatlashtirilgan tizimi” bilan o‘zaro integratsiya qilindi.

“Raqamli idora” loyihasini amalga oshirish uchun axborot tizimi ishga tushirildi (office.egov.uz).
“Raqamli idora” axborot tizimida bugungi kunda:
hujjat almashish va ish yuritishni elektron shaklga o‘tkazish bo‘yicha yagona elektron hujjat aylanish tizimi, yig‘ilish va tadbirlar kalendari, himoyalangan videokonferensiyalar o‘tkazish imkoniyatlari sinov tarzida ishga tushirilgan;
“Ijro.gov.uz” ijro intizomi idoralararo yagona elektron tizimi, Normativ-huquqiy hujjatlar loyihalari muhokamasi portali, Normativ-huquqiy hujjatlar loyihalarini ishlab chiqish va kelishishning yagona elektron tizimi va boshqa tizimlarga kirishning yagona nuqtasi shakllantirilgan;
Shu bilan birga, O‘zbekiston Respublikasi Prezidentining “2022-2023 yillarda axborot-kommunikatsiya texnologiyalari sohasini yangi bosqichga olib chiqish chora-tadbirlari to‘g‘risida” 2022 yil 22 avgustdagi PQ-357-son qarori qabul qilindi.
Qaror 10-bandiga asosan “Raqamli idora” – “Digital office” elektron tizimini ishlab chiqish va bosqichma-bosqich joriy etish (2023 yil 1 yanvarga qadar birinchi bosqichda, sinov tariqasida Axborot texnologiyalari vazirligi tizimida joriy etish, keyinchalik barcha davlat organlarida) bo‘yicha chora-tadbirlar belgilandi.
Qarorning 19-ilovasiga asosan “Raqamli idora” tizimida yagona nuqta orqali kirish imkoniyati yaratiladigan 10 ta davlat organining 15 ta axborot tizimlari ro‘yxati tasdiqlandi.
Axborot tizimi O‘zbekiston Respublikasi Prezidentining virtual qabulxonasi bilan integratsiya qilish asosida davlat organlarida aholi bilan hujjat almashish yo‘lga qo‘yiladi.

Axborot texnologiyalari va kommunikatsiyalarini rivojlantirish vazirligi tomonidan ishlab chiqilgan “Ma’muriy tartib-taomillarni optimallashtirish va boshqaruv jarayonini avtomatlashtirish uchun “Raqamli idora” loyihasini joriy etish chora-tadbirlar rejasi” 2022 yil 28 aprelda O‘zbekiston Respublikasi Bosh vaziri tomonidan tasdiqlandi.
Chora-tadbirlar rejasi barcha manfaatdor vazirlik va idoralarga ijro uchun yuborildi (29.04.2022 y., 08/1-180-son).
Chora-tadbirlar rejasiga asosan:
“Raqamli idora” loyihasining arxitekturasi, “frontend” qismi va UX/UI dizayni ishlab chiqildi.
“Raqamli idora” loyihasi axborot tizimlari bilan integratsiyasi amalga oshirildi:
1) Yagona identifikatsiya tizimi «id.egov.uz»;
2) Ijro intizomi idoralararo yagona elektron tizimi «ijro.gov.uz»;
3) Normativ-huquqiy hujjatlar loyihasini ishlab chiqish va kelishishning yagona elektron tizimi «project.gov.uz»;
4) Normativ-huquqiy hujjatlar loyihalari muhokamasi portali «regulation.gov.uz»;
5) Investitsiya loyihalarini amalga oshirish va monitoring qilish tizimi “pmi.gov.uz”;
6) Videokonferensaloqa tizimi «conf.uzcloud.uz»;
7) O‘zbekiston Respublikasining seysmik faol hududlarida joylashgan bino va inshootlarning elektron texnik pasportlari tizimi “rasportbino.uz”;
8) office.egov.uz;
9) arm.gov.uz.
Bugungi kunda “Raqamli idora” loyihasi office.egov.uz manzilida test-sinov tariqasida ishga tushirildi. 
“Raqamli idora” platformasida quyidagi axborot tizimlari bilan integratsiya qilish ishlari amalga oshirilmoqda:
1) Mahalliy davlat hokimiyati organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimi “e-qaror.gov.uz”;
2) O‘zbekiston Respublikasi Prezidentining virtual qabulxonasi “pm.gov.uz”;
3) Davlat boshqaruvi axborot tizimi “db.gov.uz”;
Bundan tashqari “Pochta”, “Messenjer”, “Kalendar”, Moliya vazirligining “UzASBO” dasturiy kompleksi bilan integratsiyalashgan “Buxgalter hisobi”, Davlat xizmatini rivojlantirish agentligi va Bandlik va mehnat munosabatlari vazirligi bilan integratsiyalashgan “Kadrlar” hamda davlat xizmatchisi bilan xalq o‘rtasida muloqot o‘rnatish uchun “Onlayn-chat” modullarini yaratish ko‘zda tutilgan.
O‘zbekiston Respublikasi Prezidentining “2022-2023 yillarda axborot-kommunikatsiya texnologiyalari sohasini yangi bosqichga olib chiqish chora-tadbirlari to‘g‘risida” 2022 yil 22 avgustdagi PQ–357-son qarori qabul qilindi.
Qarorning 10-bandiga asosan Axborot texnologiyalari va kommunikatsiyalarini rivojlantirish vazirligiga 2023 yil 1 yanvarga qadar yagona elektron hujjat aylanish tizimi, xabarlar almashish messenjeri, yig‘ilish va tadbirlar kalendari, himoyalangan elektron pochta va videokonferensiyalar o‘tkazish imkoniyatlarini o‘z ichiga olgan davlat organlari va tashkilotlari xodimlarining avtomatlashtirilgan ish joyi – “Digital office” elektron tizimi ishlab chiqilishini va birinchi bosqichda, sinov tariqasida vazirlik tizimida, keyinchalik barcha davlat organlarida joriy etilishini ta’minlash yuklatilib:
“Elektron hukumat loyihalarini boshqarish markazi” davlat muassasasi “Digital office” tizimining operatori hamda uni texnik jihatdan qo‘llab-quvvatlash, uzluksiz ishlashi va axborot xavfsizligini ta’minlashga mas’ul etib belgilandi;
“Digital office” tizimi davlat organlari va tashkilotlarning tegishli axborot tizimlaridan foydalanishning yagona nuqtasi sifatida tashkil etildi.